Lindsay soek nie pleitooreenkoms

2013-03-08 15:59

Los Angeles – Die sangeres en aktrise Lindsay Lohan weier glo om ‘n pleitooreenkoms te onderteken wat bepaal dat sy tyd in ‘n tronk of ‘n rehabilitasiesentrum moet deurbring.

Aanklaers het aan die 26-jarige ‘n aanbod van 45 dae in die tronk, of 60 dae in ‘n rehabilitasiesentrum gemaak, in ‘n saak waar Lohan daarvan beskuldig word dat sy in Junie verlede jaar vir die polisie gejok het toe sy aan hulle gesê het sy het nie ‘n Porsche wat in ‘n ongeluk betrokke was, bestuur nie.

Lohan het egter albei ooreenkomste van die hand gewys omdat sy nie opgesluit wil word nie.

“Die aanklaers wil hê dat Lindsay of 45 dae in die tronk of 60 dae in ‘n rehabilitasiesentrum moet deurbring as hulle ‘n pleitooreenkoms ondergaan,” het ‘n bron Donderdag vir RadarOnline gesê.

“Iemand met Lindsay se kriminele geskiedenis is baie gelukkig om so ‘n ooreenkoms te kry, maar dit lyk nie of sy dit verstaan nie. Tensy sy haar laaste bietjie gesonde verstand gebruik, gaan hierdie saak hof toe.”

Mark Heller, Lohan se prokureur is glo positief dat hy ‘n ooreenkoms met die aanklaers kan bereik, maar Lohan wil voortgaan met die verhoor wat op 18 Maart sal begin.

– Volg Nuus24 op Twitter