Lindsay Lohan wéér in die moeilikheid

2012-11-30 14:12

Los Angeles – Die aktrise Lindsay Lohan is weer in die moeilikheid nadat dit Donderdag aan die lig gekom het dat sy vir die polisie in Los Angeles gejok het.

Lohan is ure voor dié onthulling in hegtenis geneem nadat sy 'n vrou in 'n New Yorkse nagklub geslaan het. Sy is omstreeks 04:00 Donderdagoggend in hegtenis geneem toe sy probeer het om uit die Club Avenue-nagklub te vlug.

Die 26-jarige Mean Girls- en Parent Trap-ster het in onlangse jare verskeie kere met die gereg gebots en is tronk toe omdat sy haar proeftydperk-voorwaardes verontagsaam het.

Die saak in Los Angeles hou verband met 'n ongeluk wat in Junie plaasgevind het. Die polisie het vasgestel dat sy gejok het toe sy aan hulle gesê het sy het nie die Porsche wat in die ongeluk betrokke was, bestuur nie, berig die Los Angeles Times.

Lohan is ondermeer daarvan aangekla dat sy valse inligting aan die polisie verskaf het. Aanklagte van roekelose bestuur is ook teen haar aanhangig gemaak.

– Volg Nuus24 op Twitter

- Sapa - AFP