Lindsay Lohan dalk nie weer aangekla
2011-02-08 10:34
Los Angeles – Die aktrise Lindsay Lohan is nog nie van diefstal aangekla nie nadat daar beweer is dat sy ‘n halssnoer van $2,500 (sowat R18,000) van 'n winkel in haar buurt, Venice Beach, Kalifornië, gegaps het.
Volgens Jane Robinson, woordvoerder van die kantoor van die distriksprokureur, is die nodige dokumentasie nog nie ingehandig nie.
Daar word egter geglo dat die 24-jarige Lohan nie aangekla gaan word nie terwyl daar in die binnekringe gegis word dat die papierwerk later hierdie week ingedien gaan word.
‘n Bron het aan RadarOnline.com gesê dat klagtes hierdie week teen Lohan gelê gaan word en dat ‘n paar dinge nog eers uitgesorteer moet word.
Die polisie in Los Angeles het ‘n lasbrief bekom om die aktrise se huis verlede Dinsdag te deursoek nadat die winkeleienaars bekommerd geraak het oor die halssnoer.
Personeel by die betrokke winkel beweer hul het 'n video wat wys hoe Lohan die halssnoer aanpas, maar hulle kan nie bewys hoe sy die winkel met die item in haar besit verlaat het nie.
Lohan beweer op haar beurt sy het die halssnoer met die toestemming van die eienaar geleen en dat een van haar vriende die juwele intussen aan die owerhede terugbesorg het.
- Vir meer inligting besoek iol.
- Volg Nuus24 op Twitter.