Legende van musiekbedryf pleeg glo selfmoord
2012-08-31 11:46
New York – Die kletsrymer 50 Cent se bestuurder, Chris Lighty, is dood in sy huis in New York aangetref.
Lighty, wat 44 jaar oud was, was deur die loop van sy loopbaan die bestuurder van verskeie groot kunstenaars, insluitend P. Diddy, Ja Rule en Mariah Carey.
Hoewel die oorsaak van sy dood nog nie amptelik vasgestel is nie, het bronne aan die New York Daily News gesê hy het homself moontlik in die kop geskiet.
Verskeie sterre het hulde aan Lighty gebring, insluitend Russel Simmons, mede-stigter van die platemaatskappy Def Jam, wat hom as ‘n “briljante sakevennoot” beskryf het.
“Ek is baie hartseer oor die verlies van ‘n hip-hop-held,” het Simmons in ‘n verklaring gesê.
“Chris Lighty was ‘n goeie vriend van my sedert ons kinders was. Hy was ‘n briljante sakevennoot en ek is so trots op alles wat hy bereik het.”
“Hy is die beste voorbeeld van hoe ’n passievolle kind van die straat af in een van die beste bestuurders in die bedryf en ‘n vrygewige weldoener kan verander. Almal wat hom geken het, was lief vir hom, ek inkluis. Hy gaan vreeslik gemis word.”
Scooter Braun, bestuurder van die hartebreker Justin Bieber sowel as die kunstenaar Rihanna het ook albei op Twitter hulde aan Lighty gebring.
“Moeilik om te glo, maar rus sag my vriend Chris Lighty. Te gou weggeneem,” het Braun geskryf.
“Rus in vrede Chris Lighty, my gebede gaan uit aan jou familie en geliefdes! Here, wees genadig,” het Rihanna getweet.
– Volg Nuus24 op Twitter
- BangShowBiz
