Larry Hagman is weer JR in Dallas
2011-07-18 09:03
Los Angeles. – Die televisiereeks Dallas gaan na die kassie terugkeer met Larry Hagman (79) wat weer as JR Ewing by sy medeveterane sal aansluit om die Ewings te laat herleef.
Linda Gray (70), wat Sue Ellen in gespeel het, en Patrick Duffy (62), wat Bobby Ewing gespeel het, sal ook hul oorspronklike karakters speel, het die TNT-televisiekanaal gesê.
“Dis baie opwindend om nuwe en bekende karakters in die hande van ’n droomrolverdeling te sien,” het mnr. Michael Wright, programbestuurder van TNT, TBS en Turner Classic Movies, gesê.
Dallas was een van die suksesvolste programme in die geskiedenis van Amerika se spitstyd-televisie en was ook wêreldwyd ’n groot sukses. Die sepie was van 1978 tot 1991 op die kassie. Die nuwe reeks sal middel volgende jaar uitgesaai word.
- Die Burger