Sportaanbieder geskors oor Linkin Park-tweet

2012-11-08 12:14

Kaapstad –  Die televisiekanaal eNCA het die sportaanbieder Lance Witten geskors oor tweets wat verband hou met die tragedie by Woensdagaand se Linkin Park-konsert.

Witten het Donderdagoggend 'n grap gemaak op die sosiale netwerk nadat 'n vrou dood is toe steierwerk Woensdagaand, kort voor Linkin Park se konsert, buite die Kaapstad-stadion omgewaai is. Altesaam 19 ander mense is beseer.



Hy het kort daarna om verskoning gevra en gesê die tweet is "uiters onsensitief, in swak smaak en simpel".

Die 24-uur-nuuskanaal het op sy amptelike Twitterblad gesê Witten se uitlatings weerspieël nie die sienings of waardes van die maatskappy nie.

"'n Interne ondersoek na mnr. Witten se uitlatings sal gedoen word."

Witten het intussen die tweet verwyder.

'n Ondersoek na Woensdagaand se tragedie is intussen van stapel gestuur.

– Volg Nuus24 op Twitter

- Nuus24