LJ vra sy Irvette die groot vraag
2011-12-12 09:35
Johannesburg – Die 400m-hekkiesatleet LJ van Zyl het die kroon gespan op ’n droomseisoen deur verloof te raak aan Suid-Afrika se goue meisie van padwedlope, Irvette van Blerk.
Die paartjie het Saterdag verloof geraak, ’n dag voordat Van Zyl vir ’n oefenkamp in George vertrek het met die oog op die Olimpiese Spele volgende jaar in Londen.
Van Zyl het Sondag gesê dit is belangrik vir hom om sy lewe te deel met iemand wat soos hy oor sport voel en ’n atleet se persoonlikheid verstaan.
“Nou kan ek ontspan, en fokus op die Olimpiese Spele.”
Van Zyl sê hy en Van Blerk deel ook ander belangstellings, wat meebring dat hulle mekaar goed verstaan.
Dis welbekend dat Van Zyl ’n groot deel van die wengeld wat hy van Yellow Pages gekry het toe hy sy rekord van 47.66 sekondes opgestel het, bestee het aan die koop van nog beeste. Van Blerk kweek op haar beurt blomme.
Die paartjie het mekaar in 2004 op die Suid-Afrikaanse junior kampioenskap in Bloemfontein ontmoet, sê Van Zyl.
“Ons gaan al uit sedert 2008, ná die Olimpiese Spele in Beijing, en voor dit het ons kontak met mekaar behou. Ons het in daardie tyd baie saam bergfiets gery.”
Van Zyl sê hy het iets spesiaals vir Van Blerk by sy huis in Pretoria voorberei, en haar later na ’n restaurant geneem om die geleentheid met vonkelwyn te vier. Hulle beplan om ses weke ná die Olimpiese Spele af te haak.
Ondanks hul groot planne vir volgende jaar, sal die troue nie sy aandag aftrek van sy voorbereiding vir die Spele nie, sê Van Zyl.
– Volg Nuus24 op Twitter
- SAPA