Kykers sal baat by prysoorlog in TV-mark
2010-05-01 01:00
Thinus Ferreira, Die Burger
Johannesburg - ’n Betaal-TV-revolusie kom vir Suid-Afrika met die nuus dat TopTV-dekodeerders net R499 elk gaan kos.
TopTV begin Saterdag 55 TV-kanale op dié nuwe satelliet-betaaltelevisiediens uitsaai. Dekodeerders is van Saterdag op winkelrakke.
Hoewel TopTV gesê het hy is nie van plan om met MultiChoice se DStv-satellietdiens mee te ding nie, is dit nou baie duidelik dat TopTV se koms as Suid-Afrika se tweede betaaltelevisie-operateur ’n massiewe prysoorlog in die satelliet-TV-mark gaan afgee, met TV-kykers wat die wenners gaan wees.
Selfs die regering se komende steltopbokse (STB’s) vir Suid-Afrika se oorskakeling na digitale terrestriële televisie (DTT) gaan teen R700 per STB duurder kos as die dekodeerders waarmee TopTV nou die mark betree.
Die SABC se TV-kanale en e.tv sal ook daarop gesien kan word.
On Digital Media (ODM), wat TopTV met miljarde rande se aanvangskapitaal bedryf, het belowe om installerings gratis binne 48 uur te doen nadat ’n intekenaar ’n STB gekoop het.
Die gratis installering deur een van 900 installeerders landwyd sluit ook ’n gratis satellietskottel van 80 cm in. Dit beteken dat ODM die STB- en installeringskoste tot ’n baie groter mate gaan subsidieer as wat MultiChoice tans doen.
TopTV-intekenare kan kies hoeveel kanale hulle wil hê, met ’n maandelikse subskripsiegeld wat wissel van R99 tot R249.
Vino Govender, ODM se uitvoerende hoof, het Donderdag aan Die Burger gesê TopTV se een sportkanaal, TopSport, sal nie dadelik begin uitsaai nie omdat daar nog na sportregte gesoek word.
MultiChoice het reeds gesê geen SuperSport-regte sal aan TopTV gegee word nie.
Govender het gesê: “Ons sal graag SuperSport-regte wil hê, maar dit is iets vir die toekoms.”
Sportuitsendings is naas flieks die grootste dryfveer agter betaal-TV in die wêreld.
“Veral Pep is reeds oorval deur mense wat ’n TopTV-dekodeerder wil koop,’’ het Govender gesê.
- Die Burger
Volg Nuus24 op Twitter