Kykers gis oor Storm gou Survivor los
2010-01-22 07:42
Kaapstad - “My baba is die grootste rede hoekom ek wou weg. Ek het my kind gemis – (dit was) die paranoia van ’n ma.’’
Só sê die Kaapse supermodel Christina Storm, wat heel eerste M-Net se realiteitsreeks Survivor SA Santa Carolina verlaat het.
Baie kykers het gister aan Die Burger gesê hulle wonder wat M-Net wegsteek rondom die model se stormagtige vertrek uit die reeks.
Die redigering van die eerste episode het dit vir gewone kykers onmoontlik gemaak om vas te stel hoekom Storm van die eiland wil wegvlug, hoe sy dit reggekry en met wie sy gepraat het, en hoekom die vervaardigers dit toegelaat het. Storm se “onderhandelings’’ en gesprekke met die vervaardigers om die reeks te verlaat en die gepaardgaande drama is glad nie uitgesaai nie.
M-Net het gister gesê die beeldmateriaal rondom Storm se onverwagte vertrek wat wel uitgesaai was, “is ’n opsomming van die gesprekke wat die kamera vasgevang het’’. Die betaalkanaal het gesê die 18 bekendes is almal vooraf ingelig dat hulle nie teen hul sin op die eiland hoef te bly nie.
Die temperamentele Storm was op die tweede dag reeds keelvol en wou die trekpas vat. Op die derde dag van verfilming het sy besluit sy het genoeg gehad en met die produksiespan begin praat. Deelnemers mag nie met die kameramanne praat wat hulle verfilm nie.
“Survivor SA Santa Carolina is ’n realiteitsprogram en die uitsaaier en vervaardiger meng nie in met die storie wat hom uitspeel nie,’’ het M-Net gesê.
In Storm se “uitstem’’-video-onderhoud, wat net op die TV-reeks se webruimte gesien kan word, sê sy bloot: “My hart was nie daar nie. Ek het besluit om te gaan en ek het gedink ek gaan sterk wees, maar my hart was nie sterk genoeg nie. Ek is spyt dat ek die eiland moes verlaat. Die eerste nag het ek net daar op die strand gelê en kon glad nie slaap nie.’’
- Die Burger
- Die Burger