‘Kyk wie is dit: Karate Kallie!’
2009-09-29 07:19
Daniëlla du Plooy
Pretoria - Mense herken hom op straat as Karate Kallie en op Aardklop vertolk hy die rol van Karel Koekemoer.
Dié grapkas sê egter hy is nou reg vir “diep drama”.
Wynand van Vollenstee (25) het tot dusver naam gemaak as die hoofkarakter in Karate Kallie, ’n Afrikaanse komedie wat tans in teaters te sien is.
Op die fees is hy te sien in Hotel Hel, nóg ’n komedie, uit die pen van Henriëtta Gryffenberg. In sy rol as Karel Koekemoer is hy ’n suinige veramerikaansde Boerseun wat teen sy sin in ’n plaaslike hotel beland.
Daar loop hy hom vas teen ’n portier (Samson Khumalo van The Coconuts) wat “enigiets” sal doen vir sy fooitjie?.?.?.
“Ek’s mal oor komedie,” sê Wynand ná hul laaste repetisie voordat die fees amptelik begin. Hy steek ’n sigaret aan en skep eers asem voordat hy verder praat.
“Ek doen dit gereeld, maar dis nie ál waarvan ek hou en wat ek wil doen nie.”
Hy wil binnekort ook nog “diep drama” aanpak. En ’n toneelstuk skryf. Én die regie behartig.
“Ons is verby die punt waar ’n mens maar net kan ‘act’ en daarop oorleef. Jy moet alles kan doen.”
Wynand, ’n boorling van “?‘wacky’ Witbank”, is al van jongs af mal oor die verhoog.
“My tuisdorp was seker nou nie juis die land se kunste-‘capital’ nie, maar ek’t myself nog altyd uitgeleef in toneel. En my ouers het my heeltyd ondersteun.”
Hy’t ná skool ’n jaar lank “iets in die hotelbedryf” geswot en opgeskop. Daarna het hy gaan skottelgoed was in Londen.
“Maar hel, ek’t geweet dít sal darem nie werk nie. Toe kom ek maar terug en doen wat ek regtig wil.”
Hy het drama aan die Tshwane-Universiteit van Tegnologie (TUT) geswot en “sover werk dinge nog goed uit”.
Hoewel hy meestal in komiese rolle te sien is, kyk hy self nie gereeld komiese flieks en reekse nie.
“Ek’t baie respek en agting vir mense soos Tobie Cronjé en Pierre van Pletzen.
“Maar ek’s lugtig om te veel te kyk en dan so half my eie styl te verloor.”
Wat hy wel gereeld kyk, is “sielkundige goed”, soos van Anthony Hopkins se flieks.
“O, en natuurlik Woody Allen. Dis die soort komedie wat nie so ‘obvious’ is nie. Jy moet luister, die ‘layers of the onion’ afskil.”
Hy’s verstom oor mense se reaksie op Karate Kallie, sê Wynand. “Veral in die verkeer herken hulle my en gil vir ‘Kallie’. Dis ‘weird’!”
Teater bly sy eerste liefde. “Elkeen het sy eie uitdagings. Teater is heelwat moeiliker – daar’s net een ‘take’ – maar dis ook meer bevredigend.”
* kykNET Gimmies; R70; 30 Sept. 10:30, 1 Okt. 17:30,2 Okt. 16:00 en 3 Okt. 17:30.
- Beeld