Kurt is topverkoper
2010-01-04 13:38
Philip de Bruin
Johannesburg - Kurt Darren het in 2009 die meeste CD’s in Suid-Afrika verkoop.
Sy CD Uit die diepte van my hart met die treffer “Kaptein, span die seile” daarop is volgens die amptelike lys van topverkopers die voorloper van die jaar met verkope van meer as 160 000.
Dié CD was 35 weke lank op die lys van die 20 top-verkopers.
Darren het só afgereken met oorsese kunstenaars soos Josh Groban, Michael Jackson, Whitney Houston, Susan Boyle en Enrique Iglesias.
Die 30 top-verkopers van die jaar word bereken deur te kyk na alle CD’s se vertoning deur die jaar op die amptelike weeklikse top 20-lys, wat op sy beurt bereken word aan die hand van verkoopsyfers soos handelaars dit verskaf.
Die top 30-lys is die naweek bekend gemaak en het ’n eerste opgelewer: die eerste vyf plekke word almal deur Afrikaanse sangers beklee.
Darren was gister eers uit die veld geslaan en toe verheug oor sy prestasie.
“Dit is fantasties. Ongelooflik. Dankie aan my getroue ondersteuners en dankie aan my span by Select (Musiek, sy platemaatskappy).
“Dié goeie nuus kry ek net ’n week nadat ek gehoor het dat my jongste CD, Beste medisyne, op die punt staan om dubbel-platinumstatus (80 000 verkope) te bereik – binne net ’n maand nadat dit uitgereik is.
“As hy dié status bereik, sal dit my negende CD wees wat dubbel-platinumstatus bereik.
“Ek het werklik baie om voor dankbaar te wees.”
Niemand kon die naweek by navraag sê of Darren nou al Steve Hofmeyr as algehele top-verkoper van lewende sangers verbygesteek het nie.
Gé Korsten en Bles Bridges is egter steeds die voorlopers.
Bok van Blerk was 2009 se naaswenner met sy CD Afrikanerhart (30 weke op die top 20). In die derde plek is 10 jaar platinumtreffers van Juanita du Plessis (28 weke), vierde is Breek die ys (23 weke) van Ray Dylan en vyfde Ons lieflinge/Our darlings (22 weke) van Rudi (Claase) en Corlea (Botha).
- Beeld