Kunstenaars help uitsaai op radio Houtstok
2011-03-24 07:36
Kaapstad - Die debakel rondom Radio Houtstok en sy grootbaas kring steeds uit, maar die radiostasie gaan desondanks voort om uit te saai.
Dit blyk dat binnegevegte een van die hoofoorsake van die probleme by die stasie is.
Die omroepers het Maandag besluit om hul tasse te pak en die stasie te los. Hulle voer aan dat hulle nie vir die werk betaal is nie.
Louis Baartman, uitvoerende hoof, het Woensdag gesê hulle ís betaal, maar een of twee is nie volle salarisse betaal nie.
Groot ongelukkigheid heers ook onder die omroepers oor die manier waarop die stasie bestuur word.
Woensdag het verskeie Afrikaanse kunstenaars hul lywe omroeper gehou en die musiek op die stasie laat pomp.
Volgens Baartman het hulle aangebied om omroepers vir die dag te wees. “Hulle het self aangebied om te kom uitsaai. Sowat 10 kunstenaars gaan omroepers wees en ons is tot Vrydag vol.”
Andries Vermeulen, Rooies en Hugo Nieuwoudt het Woensdag op Radio Houtstok uitgesaai, en op die radiostasie se Facebook-blad was luisteraars gaande oor hulle.
Vermeulen het aan Die Burger gesê hy dink die kunstenaars sal hande vat om Radio Houtstok te help waar hulle kan.
“Dit gaan jammer wees as die stasie nie meer daar gaan wees nie. Ek het voorgestel dat ek weer ’n keer omroeper kan speel. Die terugvoering wat ons gekry het, was baie goed en ek sal dit geniet.”
Luisteraars het egter gepleit dat die politiekery nie die radiostasie leed aandoen nie.
- Die Burger