Kunstefees-konsert ten bate van Lucas
2011-02-11 09:17
Bloemfontein - Die sangers Kurt Darren, Anton Goosen, André Swiegers, Coenie de Villiers, Dozi, Mathys Roets, Jannie Moolman, Valiant Swart, Danie Niehaus en Lucas Maree se dogters, Monica en Linda, is op die lys van kunstenaars wat deelneem aan ’n konsert ten bate van Lucas Maree op die Volksblad-kunstefees, wat van 12-17 Julie 2010 gehou word.
Een uit ’n miljoen – vir Lucas Maree word op 12 en 13 Julie in die Sand du Plessis-teater aangebied. Altesaam 18 verskillende sangers en musikante gaan die Sand du Plessis-teater vul met hul stories oor Lucas en die liedjies wat hom een van ons land se gewildste Afrikaanse sangers en liedjieskrywers gemaak het.
Die produksie en regie word behartig deur Alexa Strachan en Matthys Maree sal die musiekregie en verwerkings doen.
Die orkes bestaan uit Matthys Maree agter die klavier, Juan (Floors) Oosthuizen op kitaar, David Klassen op drommme en perkussie en Leon Ecroignard op kontrabas en baskitaar.
Strachan sê die boodskap op die omslag van die Een uit ’n miljoen vir Lucas Maree-CD, waarop verskeie kunstenaars sy liedjies sing om geld in te samel vir Lucas se mediese koste, som die atmosfeer en aard van die konsert op. Sy vriende skryf:
“Aan Lucas, ons gerespekteerde kollega, vrygewige vriend, en onselfsugtige voorbeeld.
“Die meeste van ons ken jou al langer as nodig (niks te make met die vriendskap nie, meer vanweë die ouderdom).
“Jy is vir ons onderskeidelik meester-liedjieskrywer, kalmerende seël, kop-oopmaker, mede-filosoof, grondleggende invloed, liefdevolle raadgewer, mentor, maat en broer.
“Ons wens vir jou is iets voorspoedigs, hoopvol en ryk.
Strachan benadruk: “Hierdie konsert gaan nie trietsig wees nie, maar gaan gatskop.
“Dit is ’n viering van Lucas se lewe en musiek.”
Lucas se wens dat Bloemfonteiners by die produksie betrokke moet wees, gaan ook verwesenlik word en hierdie kunstenaars sal eersdaags aangekondig word.
Kaartjieverkope vir die Volksblad-kunstefees open op 29 April by Computicket. Die opbrengs uit die konserte gaan na die Maree-familie.
Hierdie konsert word moontlik gemaak deur Kloppers. Volksblad is die mediaborg; Urban Hotel voorsien die verblyf en die kunstenaars vlieg met Mango.
Hou ook die fees se webblad www.volksbladfees.co.za dop vir meer inligting.
- Volksblad