Kunsskatte van R500 m. in gedrang

2012-01-20 08:07

Kaapstad – ’n Versameling onvervangbare kunsskatte in die kelder van die Johannesburgse Kunsmuseum kan vernietig word weens die munisipaliteit se jare lange gebrek aan onderhoud.

Keramiekbakke van die Ming-dinastie (1368 tot 1644), antieke meubels en werke van plaaslike kunstenaars soos Gerard Sekoto, Irma Stern, William Kentridge, Jane Alexander en Nicholas Hlobo wat sowat R500 miljoen werd is, is in gedrang.

Dít is omdat die rioolnetwerk meer as vier jaar gelede versien is en instandinghoudingswerk aan die gebou agterweë gelaat is, het Antoinette Murdoch, hoofkurator, gesê.

“Die infrastruktuur, waaronder die lugreëling en beligting, is ook al jare sonder onderhoud en op die ou end breek alles net. Ek wil net hê die gemeenskap moenie die museum vir wanbestuur blameer nie.”

Die laaste werkende pomp wat rioolvuil uit die gebou moet pomp, het Maandag gebreek. Die eerste pomp het verlede maand die gees gegee. Dít veroorsaak dat rioolvuil in die skag waarin die pompe gebou is, versamel en opstoot.

“Teen die einde van die week is dit moontlik dat dié rioolvuil deur die muur van die aangrensende stoorkamers sal sypel, oor die skagdeur sal stoot en werke van onskatbare waarde sal vernietig.”

Die dak toon op talle plekke in uitstallokale ook waterskade.

Die Johannesburgse metro het onlangs ’n kostebesnoeiing aangekondig wat moontlik eers teen Maart deurgevoer sal word, het Gabu Tugwana, woordvoerder, gesê.

Beeld het verneem R25 miljoen gaan besnoei word, maar Tugwana kon dit nie bevestig nie.

“Die stadsraad kan nie toelaat dat die situasie handuit ruk en dat die inwoners van Johannesburg se waardevolle bates skade ly nie. Reëlings is reeds getref sodat diensverskaffers kwotasies kan indien. Hieruit sal ’n gepaste diensverskaffer aangestel word om dié probleme reg te stel,” het Tugwana gesê.

Volgens Murdoch is dié prosesse egter te langdradig vir die krisis op hande. “Dié probleem word nie as ’n noodgeval beskou nie. Ons is onderhewig aan ’n proses waar ons kwotasies moet aanvra en verskaf en wag sodat dit goedgekeur word voordat die werk gedoen word. Wanneer die rioolvuil besig is om in die museum op te stoot, is daar nie tyd vir prosesse nie.”

Tugwana het die beweerde voortdurende nalatigheid met die instandhouding betwyfel, maar onderneem om aandag aan die saak te skenk.

– Volg Nuus24 op Twitter

- Beeld