Kritici: Dylan-kuns tangerig
2010-09-07 12:17
Kopenhagen – Kunskritici het die legendariese musikant Bob Dylan as ‘n amateur-skilder bestempel en gesê sy kunswerke het geen plek in Denemarke se grootste museum nie.
'n Uitstalling van dié musiek-ikoon se nuwe versameling skilderye het onlangs in Kopenhagen geopen.
“Wanneer ons oor musiek praat, is Bob Dylan een van die Picasso’s van die 20ste eeu, maar dit geld nie vir sy skilderye nie,” het die daaglikse koerant Berlingske Tidende gesê nadat Dylan se “The Brazil Series” Saterdag geopen het.
“Bob Dylan skilder soos enige ander amateur en gebruik nogal ‘n tangerige figuratiewe styl,” het die professor van kunsgeskiedenis Peter Brix Soendergaard, tydens ‘n onderhoud met die dagblad Information, gesê.
“Hy is wat ons in die oudae ‘n Sondagskilder genoem het.”
Die finansiële koerant Boersen het die bestuur van die Statens Museum for Kunst blameer omdat hulle finansieel meer belanggestel het in die uitstalling as in die kuns self.
Boersen meen die museum het geweet die Dylan-naam sou baie mense lok.
Die museum het gereageer deur te sê dat hulle dink Dylan se kunswerke is van hoë gehalte en hy lok baie belangstelling onder Deense skilders en kunsversamelaars.
Die 68-jarige Dylan is beter bekend vir sy liedjies soos "Mr Tambourine Man" en "Blowin' in the Wind", maar het later begin skilder.
"The Brazil Series" is tot 30 Januarie te sien en sluit 40 skilderye en agt tekeninge in.
Volg Nuus24 op Twitter.
- SAPA