Korsten lei nou gesogte orkes
2009-11-10 09:26
Die London Mozart Players (LMP) het pas die Suid-Afrikaanse dirigent Gérard Korsten as sy vyfde musikale direkteur aangestel.
Luidens ’n persverklaring begin Korsten se termyn van drie jaar in September 2010, al tree hy reeds in Mei 2010 saam met die orkes op in ’n konsert in die orkes se tuissaal, Fairfield Hall, in Croydon, Londen.
Korsten sal in die drie jaar voltyds verantwoordelik wees vir die orkes se musikale ontwikkeling, al die orkes se groot konserte in die Verenigde Koninkryk dirigeer, en oorsese optredes vir die orkes reël en beplan.
Simon Funnell, besturende direkteur van die LMP, sê hy is verheug dat iemand met Korsten se ervaring en musikaliteit voortaan die orkes sal lei. “Reeds van sy eerste repetisie met die orkes het hy en die orkeslede ’n goeie verhouding gehad. Ek is seker dat sy aanstelling vernuwing vir die orkes sal teweegbring.”
Vir Korsten, seun van die ontslape tenoor Gé Korsten, is die aanstelling ’n groot eer: “Dit is ’n fantastiese orkes met ’n luisterryke geskiedenis, en dis ’n plesier om met die instrumentaliste te werk. Ek is veral opgewonde oor die komende seisoen, waaraan ons tans beplan. Ek dink daar lê ’n blink toekoms vir ons voor.”
Korstens se mees onlangse optrede met die LMP was in April vanjaar toe hy die aanstellingskomitee beïndruk het met sy interpretasie van werke van Mozart, Haydn en Mendelssohn.
Hy was reeds hoofdirigent van die Staatsteater in Pretoria, die orkes van die Teatro Lirico in Italië en van die Symphonieorchester Vorarlberg Bregenz in Oostenryk.
Die LMP is in 1949 deur Harry Blech begin as die Verenigde Koninkryk se eerste kamerorkes. Die vier vorige musikale direkteurs was Andrew Parrott, Matthias Bamert, Jane Glover en Blech. Ander befaamde dirigente saam met wie die orkes gewerk het, sluit in John Barbirolli, John Eliot Gardiner, Charles Mackerras en Roger Norrington.
-Sapa en Die Burger