Koninklikes ontstoke oor nóg Kate-foto's

2013-02-13 10:30

Londen – 'n Italiaanse tydskrif wat verlede jaar ook naakfoto’s van prins William se vrou, Kate Middleton, gepubliseer het, oorweeg dit glo om nuwe intieme foto’s van haar met die wêreld te deel.

Dié jongste foto's van die hertogin van Cambridge is glo tydens ‘n vakansie in die Karibiese Eilande geneem.

Die koninklike familie het die tydskrif se planne egter skerp gekritiseer.

Die St. James-paleis het Dinsdag in 'n verklaring sy teleurstelling uitgespreek oor die moontlike publisering van die foto’s, en gesê dit is ‘n direkte skending van die paartjie se reg op privaatheid.

Dis egter nie duidelik of regstappe teen die glanstydskrif oorweeg word nie.

Die tydskrif, Chi, beplan glo om Woensdag die foto’s te publiseer. Dit wys glo hoe Middleton op die Mustique-eiland in ‘n bikini saam met William rondloop.

Die tydskrif, wat deur die voormalige Italiaanse premier Silvio Berlusconi besit word, was verlede September een van 'n paar skinderblaaie wat naakfoto’s van die hertogin gepubliseer het ná 'n Franse tydskrif dit aanvanklik gedoen het.

– Volg Nuus24 op Twitter
 

- Sapa - AP