Kommer dat Zietsman se nier nie reg werk nie
2011-05-09 07:34
Johannesburg – Dokters was gister bekommerd dat die nier wat die kabaretkunstenaar Elsabé Zietsman aan haar susterskind geskenk het, deur dié se liggaam verwerp word.
Retha Schoeman, ma van Retha Schoeman (28), het gesê ’n biopsie het getoon dat dit net akute nierskok is.
Volgens haar is dit iets wat vanself sal opklaar.
“Die nier skei wel urine af, maar nog nie naastenby genoeg nie. Ons was baie bekommerd, maar is nou weer vol hoop nadat ons met die dokters gesels het.”
Schoeman sukkel al sedert haar tienerjare met nierversaking en het op 14 ’n nier van haar ma gekry.
Dié nier, asook ’n kadawer-nier wat daarna ingeplant is, is elke keer ná sowat twee jaar verwerp, onder meer nadat sy infeksies opgedoen het.
Volgens Schoeman sr. is haar dogter steeds in die waakeenheid in die Jakaranda-hospitaal in Pretoria, maar dit gaan baie goed met haar.
“Sy lag baie en is weer vol grappies. Daai ene is mos ’n regte trooper.”
Zietsman is Saterdagmiddag uit die hoësorgeenheid in die hospitaal na ’n gewone saal oorgeplaas, maar het gesê sy verduur steeds baie pyn.
“Die dokters het vir my gesê ek sal ná vyf dae ontslaan word, maar soos ek nou voel weet ek nie of dit gaan gebeur nie.
“Dit is ek wat hier lê en vrek; daai ander ene is op en wakker,” het sy grappenderwys bygevoeg.
Volg Nuus24 op Twitter
- Beeld