Koerante vuur skrywer aan
2010-10-18 12:36
Mariana Malan
DieBurger
Kaapstad - 'n Voertuigkaping het van Jassy MacKenzie ’n misdaadskrywer gemaak. Haar derde boek is pas uitgereik en sy is tans in San Francisco, waar sy aan ’n paneelbespreking saam met misdaadskrywers van oor die wêreld heen sal deelneem.
“Direk nadat ek voor my huis met ’n rewolwer gedreig en van my motor beroof is, was ek bang en senuagtig. Ek het begin navorsing doen oor mense wat minder gelukkig as ek was en hul lewens verloor het.
“Daar was soveel grusame stories, maar ek het mettertyd besef nie alle kapings is noodwendig toevallige misdaad nie. In die samelewing waarin ons leef word die misdaadsituasie misbruik vir goed beplande moorde.”
’n Jaar ná haar ondervinding het die “ratte begin klik” en die boek Random Violence het gevolg. Dit is goed ontvang en benoem vir die Statebondskrywersprys se Afrika-streeksronde. Haar tweede boek, My Brother’s Keeper, was ’n finalis in die kategorie vir slapbandboeke van die International Thriller Awards en op die kortlys van M-Net se literêre toekennings in die filmkategorie.
Haar jongste boek, Stolen Lives, gaan oor mensehandel en die karakters van haar eerste boek, privaatspeurder Jade de Jong en superintendent David Patel, is terug. Jade se storie word voortgesit in The Fallen, die boek waarmee sy nou besig is.
“Jade is so ’n bietjie soos ek en ’n bietjie soos Modesty Blaise. Sy is soms roekeloos en gewoonlik in beheer. Maar ek hoop sy is ’n menslike karakter. Ek hoop lesers kan hulle met my karakters identifiseer.
“Dis ’n uitdaging om so te skryf dat ’n boek internasionaal gelees kan word sonder om plaaslike lesers met te veel besonderhede te verveel. Balans is belangrik.”
Koerante is vir haar ’n groot bron van inligting en inspirasie. “Ek kry die meeste van my inspirasie uit koerante. Wanneer ek ’n opskrif sien wat my interesseer, bêre ek dit in my laai. Ek gebruik verskillende berigte om verskillende storielyne in ’n boek te weef.”
Ironies genoeg verskil haar dagwerk hemelsbreed van die boeke wat sy skryf. Sy is die redakteur van HJ, ’n tydskrif vir haarstiliste en die skoonheidsbedryf.
“In hierdie bedryf gaan dit om uiterlike skoonheid. Ek het al deur die jare agtergekom dat dit nie noodwendig mooi mense is wat gawe en goeie mense is nie. Ek kon ook darem iets uit die bedryf gebruik in my jongste boek.” (Sy verwys na Jade se haarkleur-sessie wat verkeerd loop in Stolen Lives).
Sy is dol op haar nuwe loopbaan.
“Dis baie opwindend en ek gaan aanhou skryf en ek gaan nog ’n prys wen. En as een van my boeke verfilm kan word, sal dit die hoogtepunt van alles wees. Intussen geniet ek alles wat ek doen en kry boonop die kans om lekker sjampanje te drink en met ander wonderlike skrywers kennis te maak.”
Volg Nuus24 op Twitter.
- Die Burger