Kelly Clarkson 'voel oud'

2011-10-14 21:15

Los Angeles – Kelly Clarkson is net 29, maar die bekroonde sangeres voel glo 45.

Clarkson, wat die heel eerste seisoen van American Idol gewen het, sê sy voel baie ouer as 29 omdat sy baie druk in haar loopbaan ervaar.

Showbiz Spy berig Clarkson sê haar besige skedule is besig om sy tol te eis.

"Ek voel asof ek 45 is. Omdat my loopbaan baie skielik begin het, was daar geen groeistadium nie. Ek het goed geleer onder die druk, maar vier jaar het verbygegaan en ek was doodmoeg. Dit was vier jaar wat ek sonder ruskans moes werk," het sy in onderhoud verduidelik.

Clarkson se nuwe album Stronger is binnekort beskikbaar en kom drie jaar na die sukses van haar 2009-album All I Ever Wanted.

Volgens haar was dit die beste besluit wat sy kon gemaak het om na All I Ever Wanted eers te rus.

– Jip.

– Volg Nuus24 op Twitter.