Katy Perry se eks dood gevind
2012-09-28 09:35
Los Angeles – 'n Amerikaanse akteur is dood gevind nadat hy glo 'n 81-jarige vrou vermoor het, het die polisie Donderdag gesê.
Johnny Lewis (28), ekskêrel van die sangeres Katy Perry, bekend vir sy rol in die televisiereeks Sons of Anarchy het of na sy dood geval of gespring nadat hy 'n vrou in haar huis in die Los Feliz-woonbuurt in die ooste van Hollywood aangeval het.
Bure het gehoor hoe 'n vrou Woensdag skree en die polisie in kennis gestel. Die vrou, wat vermoedelik met 'n stomp voorwerp aangeval is, se lyk is toe in haar huis gevind.
Sy is later as Catherine Davis geïdentifiseer wat kamers aan mense verhuur het.
Twee ander mans het ligte beserings opgedoen nadat Lewis hulle by buureiendomme aangeval het, het die polisie gesê.
Die akteur se lyk is buite in die oprit gevind. Hy mag dalk 'n kamer in die huis gehuur het, het Andy Smith, woordvoerder van die Los Angeles-polisie, gesê.
"Dit lyk of 'n stryery in die huis plaasgevind het wat tot die dood van die vrou gelei het," het hy gesê en bygevoeg Lewis het of geval of van 'n dak of muur gespring.
Maar daar was "niemand wat hom gestoot het nie", het Smith gesê en beweer hy het dalk na sy dood gespring.
– Volg Nuus24 op Twitter.
- AFP
