Kate Moss vertel van maer jare
2012-10-31 13:44
New York – As jy nie daarvan hou om jou foto te laat neem nie, is jy nie alleen nie – die supermodel Kate Moss hou net so min van dié idee.
"Ek haat dit om 'n foto te laat neem. Dis aaklig. Ek knip my oë die heeltyd," het sy aan die tydskrif Vanity Fair gesê.
Moss, wat 'n bekende gesig is op die voorblaaie van glanstydskrifte, het gesê sy vaar net goed voor die kamera wanneer sy hard aan die werk is.
Die 38-jarige supermodel het in die onderhoud gesels oor haar jare in die modebedryf, en erken dat dit nie altyd maanskyn en rose was nie.
Sy het onder andere gepraat oor 'n naak-fotosessie vir die publikasie The Face, een van die projekte waaroor sy vandag spyt is.
"Nou sien ek 'n 16-jarige, en ek dink om haar te vra om haar klere uit te trek sal baie vreemd wees. Maar hulle het net gesê, 'As jy dit nie doen nie, bespreek ons jou nie weer nie.' Ek het myself in die toilet toegesluit en gehuil, en dan uitgekom en dit gedoen."
Moss het ook erken dat sy in 'n stadium té maer was.
"Ek wás maer," het sy erken. "Maar dis omdat ek vertonings gedoen het, en regtig hard gewerk het... Dan kom jy by die huis van die werk af en daar is nie kos nie. Jy daag by die werk op in die oggend, en daar is nie kos nie... Jy kry nie iets om te eet nie."
– Volg Nuus24 op Twitter.
- Reuters
