Kat Von D, Jesse James wéér uitmekaar

2011-09-26 08:49

Los Angeles – Die tatoeëerkunstenaar en televisiepersoonlikheid Kat Von D se wipplank-verhouding met Jesse James is vir ‘n tweede keer hierdie jaar beeïndig, berig Cover Media.

Von D en James, Sandra Bullock se eksman, het hul verhouding verlede maand hervat nadat hulle in Julie hul verlowing verbreek het.

Von D het op haar Facebook-blad geskryf: “Ek is nie in ‘n verhouding nie en ek vra om verskoning vir al die heen-en-weer indien dit enige onsekerheid veroorsaak het.”

Sy het aan People bevestig sy en James is nie meer 'n paartjie nie en het gesê hul verhouding het nie in die rigting gegaan waarvoor sy gehoop het nie.

“Dit was duidelik dat ons op twee verskillende paaie in die lewe is. My vriend het dit die beste gestel toe hy gesê het ek verdien meer liefde, en as ‘n vrou dink ek dis belangrik dat jy jou waarde moet ken.

“Ek wens Jesse alles van die beste toe in sy lewe en liefdeslewe.”

James het vroeër vanjaar van Bullock geskei nadat ‘n reeks vrouens beweer het hulle het almal verhoudings met hom gehad terwyl hy getroud was.

Von D en James het ‘n somertroue beplan voor hulle in Julie vir die eerste keer uitmekaar is.

‘n Maand later is haar realiteitsreeks L.A Ink gekanselleer.
 
– Volg Nuus24 op Twitter.