Karin Kortje se verhaal in Baxter op die planke
2011-11-15 07:00
Kaapstad – ’n Tweede speelvak van Karin Kortje se lewensverhaal in musiek, This is My Life, begin vandeesweek in die Baxter-konsertsaal in Kaapstad.
Die Idols-wenner van 2005 vertel die verhaal van haar nederige begin tot haar lewe in die kollig en alles wat daarmee gepaard gegaan het.
Die vervaardiger Alistair Izobell sê in ’n persverklaring dat Kortje in die proses baie seergekry het, maar dat haar talent haar telkens weer laat opstaan het.
In hierdie intieme verhaal word gekyk na ’n sprokie wat skeefgeloop het, maar nou weer op dreef is.
Die regisseur is Basil Appollis. Loukmaan Adams is ook in die rolverdeling. Camillo Lombard lei die orkes wat saam met hulle optree.
This is My Life is van 15 November tot 3 Desember van Maandae tot Saterdae op die planke. Bespreek plek by Computicket by 0861 915 8000, by www.computicket.co.za of by enige tak van Shoprite Checkers.
Volg Nuus24 op Twitter
- Die Burger