Kardashian se eks wys hy't sagte hart

2012-04-29 16:38

Los Angeles – Kris Humphries, eks van die realiteitstelevisiester Kim Kardashian, het dié week gewys hy het 'n sagte hart toe hy 'n jong kankerpasiënt op 'n spesiale uitstappie genooi het.

Boonop het dié liefdadigheidsprojek so 'n groot impak op hom gemaak dat hy nou sy roem wil gebruik om vir dié 16-jarige geld in te samel.

Kaely Kwitek, 'n limfoom-lyer en groot aanhanger van Humphries, is deur hom genooi om 'n eregas by een van sy basketbalwedstryde vir die New Jersey Nets te wees, berig die vermaakwebwerf TMZ.

Die wedstryd self het nie te goed geëindig nie (die Nets het verloor), maar Humphries het volgens bronne dié geleentheid so geniet dat hy voorgeneem het om vir Kwitek geld in te samel om haar enorme mediese onkoste te dek.

Hy wil haar glo ook na soveel as moontlik wedstryde van die Nets uitnooi.

Humphries en die realiteitstelevisiester Kim Kardashian is verlede jaar getroud, maar die huwelik het net 72 dae gehou.

– Lees hier meer.

– Volg Nuus24 op Twitter.