Kaartjies vlieg vir Suidoosterfees
2011-01-25 06:33
Kaapstad. – ’n Miernes van bedrywighede word van Dinsdag daagliks in die Kaapse middestad verwag wanneer Die Burger-Suidoosterfees in die Kunstekaap-teater- sentrum begin.
Feesgangers kan tot Sondag byna 30 verhoogproduksies te siene kry waarin van Suid-Afrikaanse se voorste vermaaklikheidsterre optree.
’n Swierige openingsgeleentheid word vir vanaand in die Kunstekaap beplan. Eerstens sal die kunstentoonstelling Terpentyn, geopen word, waarna die fees se vlagskip-produksie, Sendeling, opgevoer sal word.
Sendeling is ’n verhoogverwerking van die bekroonde Afrikaanse skrywer Elsa Joubert se kortverhaal “Die sendeling se dood”. Drie bekende akteurs – Denise Newman, Zane Meas, Stian Bam (al drie bekend vir hul rol in die sepie 7de Laan) – en Lida Botha tree daarin op.
Dr. Niel le Roux, uitvoerende hoof van die fees, is optimisties oor die agtste Suidoosterfees.
“Ons streef daarna om verlede jaar se 82%-bywoningsyfer – gebaseer op kaartjieverkope – verby te steek na 85% vanjaar.
“Dit blyk tans met die goeie kaartjieverkope dat ons op pad daarheen is.”
Hy het gesê kaartjies vir die sterbelaaide optredes het gevlieg, maar daar is nog plek vir laatslapers. Dit sluit in Vaselinetjie, die opera Der Fliegende Holländer, As Ek Maar Geweet Het van Shaleen Surtie-Richards, en Mango Groove se konsert.
Dit is ook vanjaar die eerste keer dat die fees ’n gospelkonsert aanbied waar onder andere Rouchelle Liedemann en Juanita du Plessis optree.
Kaartjies is ook nog beskikbaar vir baie van die produksies wat in die Kunstekaap se Arena-teater aangebied word.
“Die Arena-teater is juis ons platform vir opkomende en jong kunstenaars en ek moedig die publiek aan om daardie kunstenaars te ondersteun, want dit is almal fantastiese produksies,” het Le Roux bygevoeg.
Hoogtepunte onder die Arena-produksies sluit in die toneelstukke Cockroach, I Am Here en Kap ’An, die dansstuk Scars en die konsert van klassieke musiek, SOF Klassiek.
Kaartjies is by Computicket beskikbaar.
Volg Nuus24 op Twitter
- Die Burger