Kaapstadse rolprentfees fokus op Tibet
2009-07-22 10:58
Kaapstad- 'n Spesiale rolprentfees wat fokus op Tibet, Dreaming the Himalayas, word van Vrydag tot 2 Augustus in die Labia-teater in Oranjestraat, Kaapstad, aangebied.
In die prente, waarvan sommige nog nie voorheen in Kaapstad vertoon is nie, kom die kultuur, filosofie, godsdiens en towerkrag van die land en sy bewoners onder die loep.
Onder die agt prente – wat almal in die laaste dekade of wat verfilm is – is die Duitse dokumentêr The Saltmen of Tibet, wat die Tibettaanse “soutversamelaars” volg op hul maand lange reis oor die soutvlaktes om sout vir hul mense te versamel. Die mans is self aan die woord en op die agtergrond sien die kyker die ongenaakbare landskap en weerstoestande waarin hulle dié taak met bykans spirituele toewyding verrig.
Die Oostenrykse bergklimmer Heinrich Harrer, wie se buitengewone lewe die fokus was van Seven Years in Tibet (die fliek met Brad Pitt), is die fokus van die dokumentêr Seven Years in Tibet. Dit volg sy lewe vandat hy in 1944 tydens die oorlog uit ’n strafkamp vir krygsgevangenes ontsnap het en sy ontsnapping oor die Himalajas. Harrer se eie beeldmateriaal is vervat asook tonele waarin hy die jong Dalai Lama onderrig.
Die Tibettaanse Boeddhisme en die leerstellings van Dilgo Khyentse Rinpoche is die fokus van The Spirit of Tibet. Die verteller is Richard Gere en die musiek is deur die komponis Philip Glass.
Ander prente wat draai, is Lost World of Tibet van Dan Cruickshank wat fokus op die lewe in Tibet voor die Chinese besetting in 1950 en ou argiefmateriaal van daardie tyd vervat; Blessings: The Tsoknyi Mangchen Nuns of Tibet, wat handel oor jong nonne en hul spirituele toewyding, met Gere as verteller en ’n onderhoud met Tenzin Palmo; en Everest, ’n fokus op die berg se natuurskoon en die groot storm wat in 1996 agt lewens geëis het.
Kaartjies kos R25 met die gebruiklike Labia-kortings.
Bespreek by 021 424 5927. Besoek die webblad www.exploringconsciousness.org.za.
–Die Burger