Kaapstadse modeweek skop af op hoë noot
2011-07-15 10:42
Kaapstad – Die mode-ontwerper Gavin Rajah het die kollig gesteel op die eerste aand van die Kaapstadse modeweek wat by die Kaapstadse Internasionale Konferensiesentrum (Kiks) gehou word.
Rajah se kleurvolle uitrustings vir die Lente/Somer 2012 het kameras behoorlik laat flits, en dis veral aandag aan die detail en tekstuur van uitrustings wat modeliefhebbers beïndruk het.
Aanhangers wat nie die Donderdagaand se modevertoning kon bywoon nie, kon dit op Facebook volg.
Modeliefhebbers kon ook hul opgewondenheid op Twitter deel; dié tweets is regstreeks op 'n grootskerm in die balkamer uitgesaai.
Onder die bekendes wat die openingsaand van die modeweek bygewoon het, was Patrice Motsepe, die Suid-Afrikaanse mynmagnaat, en sy vrou, dr. Precious Moloi.
Jo-Ann Strauss, voormalige Mej. SA en aanbieder van die televisieprogram Top Billing, sowel as Katlego Maboe, aanbieder van die ontbytprogram Expresso op SABC3, was ook te sien.
Volgens Maboe het hy die eerste aand van die modeweek baie geniet.
"Dit is die tweede keer dat ek een van Gavin se modevertonings bywoon en ek het gehou van wat ek sien," het hy gesê.
Die modeweek duur voort tot Saterdag 16 Julie.
– Volg Nuus24 op Twitter