Kaapstad gereed vir U2-konsert
2011-02-18 12:30
Kaapstad - “Dit gaan beslis ’n konsert wees om te onthou.”
Attie van Wyk, uitvoerende hoof van Big Concerts, die maatskappy wat die U2-konserte in SA organiseer, het Donderdag tydens ’n mediatoer in die Kaapstad-stadion na die Ierse super-rockgroep U2 se verhoog gekyk en gesê alles sal gereed wees vir Vrydagaand se skouspel.
Daar word meer as 72 000 mense by dié konsert verwag. Sowat 92 000 konsertgangers het verlede Sondag die konsert in Johannesburg se FNB-stadion bygewoon.
Daar word egter verwag dat nóg duisende mense wat nié kaartjies het nie na die stad sal opruk om deel van die skouspel te wees.
Dié konsert van U2, wat deel is van hul 360°-wêreldtoer, is die grootste gebeurtenis wat nóg in die Moederstad aangebied is.
Altesaam 64 100 sokkerkykers het verlede jaar die Wêreldbeker-halfeindstryd tussen Nederland en Uruguay in die Kaapstad-stadion bygewoon.
Die kwessie oor 'n uitstaande dranklisensie is opgelos, polisiebeamptes is oorgehaal en sitplekke is gereed – dit is net die enorme verhoog wat nog voltooi moet word.
Jake Berry, U2 se produksiebestuurder, het gesê dit neem vyf dae om die verhoog op te rig en drie dae om dit af te breek.
“Dit is een van die grootste produksies wat tot dusver om die wêreld getoer het en sekerlik die grootste wat al Afrika besoek het.”
Die verhoog staan 43 m hoog en is 64 m breed en het sy eie naam: The Claw. Volgens Berry is tussen agt en nege ton staal gebruik om die struktuur, wat soos ’n klou met vier vingers lyk, te bou.
Ná die konsert word die struktuur afgebreek, in sowat 200 vraghouers verpak en per skip na Suid-Amerika geneem. Die groep se volgende optrede is op 25 Maart in Santiago, Chili. Hul wêreldtoer duur nog tot einde Julie.
John Langford, operasionele hoof van Big Concerts, het gesê sowat ’n duisend polisiebeamptes sal in en om die stadion patrolliediens verrig. Sowat 1 200 veiligheidsbeamptes sal binne die stadion diens doen.
Diegene wat gou ’n dors opbou, sal verheug wees oor die nuus dat altesaam 144 000 biere en 72 000 bottels ander drank reeds afgelewer is. Koeldranke sal ook beskikbaar wees.
Langford het gesê daar is gister sowat 100 bykomende kaartjies beskikbaar gestel en daar sal moontlik vandag nóg kaartjies beskikbaar wees.
Vir inligting oor parkeer- en vervoergeriewe, besoek Stad Kaapstad se webtuiste by www.capetown.gov.za.
- Gaan jy die konsert bywoon, of is jy reeds by die stadion? Stuur jou foto's na fotos@nuus24.com.
- Die Burger