Prins Harry se gedrag 'aanvaarbaar'

2012-08-26 07:36

Londen – Meer as tweederdes van volwassenes in Brittanje dink prins Harry se kaalbas-mannewales by 'n partytjie in Las Vegas is aanvaarbare gedrag, het 'n opname getoon.

Die YouGov-opname in The Sunday Times het bevind dat 68% dink dat die prins se gedrag aanvaarbaar is vir 'n jong, enkellopende man wat pret hê op 'n private vakansie, terwyl 22% nie ten gunste van Harry se gedrag is nie.

Sowat 75% van volwassenes beskou steeds die 27-jarige weermagvlieënier in 'n positiewe lig.

Terwyl twee foto's van Harry wyd beskikbaar is op die internet en oorsee, het slegs The Sun in Brittanje die foto's gepubliseer en sê dit was 'n groot slag vir persvryheid.

Sowat 61% van die mense het gedink Rupert Murdoch se poniekoerant was verkeerd om die foto's te publiseer, terwyl 25% gesê het Brittanje se voorste koerant het die reg gehad om die foto's te publiseer.

Altesaam 1 731 volwassenes het Donderdag en Vrydag aan die YouGov-opname oor Harry se gedrag deelgeneem en 694 volwassenes het Vrydag hul mening gelug oor The Sun se publisering van die foto's.

– Volg Nuus24 op Twitter

- Sapa - AFP