Just Jinjer-hoofsanger vir dronkbestuur gevang
2010-08-15 10:23
Ard Matthews, hoofsanger van die rockgroep Just Jinjer, het vroeg Saterdagoggend agter tralies beland nadat hy vir dronkbestuur
in hegtenis geneem is.
Die rockster sê hy is “ongelooflik skaam en jammer” oor wat gebeur het en dat hy glad nie trots is op die voorval nie.
Kapt. Ezra October, polisiewoordvoerder, sê Matthews (35) was
Saterdagoggend om 04:50 in Buitengrachtstraat in die Kaapse middestad in
’n “klein ongeluk” betrokke.
Dit is tans nog onbekend of Matthews alleen in sy bakkie was toe hy
in ’n sypaadjie vasgery het. Hy is verloof aan die model Landi
Swanepoel. Sy voertuig is deur ’n insleepdiens weggeneem.
Die sanger is deur polisiebeamptes na ’n sentrum in Vanguard Estate geneem waar die alkoholvlak in sy bloed getoets is.
Daarna is hy van dronkbestuur aangekla en tot 11:50 in
die selle van die Kaapstad-Sentraal-polisiekantoor toegesluit.
Matthews is op borgtog van R500 vrygelaat en moet Maandag in die Kaapstadse landdroshof verskyn.
Net nadat hy vrygelaat is, het hy op Facebook geskryf: “Stap nou
net uit die selle nadat ek vir dronkbestuur afgetrek is – voordat die
storie uit proporsie geruk word”.
“Ek het soos ’n idioot besluit om die kans te vat en ek is
uitgevang. Ek het die grootste les geleer en dit sal nooit in my lewe
weer gebeur nie.”
Matthews het ook gespot dat hy 'n saamrygeleentheid na die
Barnyard-teater in Willowbridge, Durbanville soek, waar die groep Sondagaand optree.
Hy het later by monde van Just Jinjer se Suid-Afrikaanse agent, Liny
Kruger, laat weet hy wil niks meer sê nie en dat sy Facebook-status sy
amptelike verklaring is.
Just Jinjer, bekend vir treffers soos What He Means en Shallow
Waters, is weer terug in Suid-Afrika nadat die groep agt jaar lank in
die VSA gewoon het. Hulle het al meer as ’n kwartmiljoen albums verkoop
en het al verhoë gedeel met groot name soos U2, Def Leppard en Counting
Crows.