Jurie verdeeld oor of Jackson se arts skuldig is
2011-11-07 07:01
Los Angeles. – Die jurie in die manslagverhoor van Michael Jackson se dokter, Conrad Murray, kon ná hul eerste dag van beraadslaging nie ooreenkom oor die uitspraak nie.
Die sewe mans en vyf vroue gaan vandag voort met hul beraadslaging oor of die 58-jarige dokter weens die popster se dood in 2009 aan strafregtelike nalatigheid skuldig is.
Jackson-aanhangers het gehoop op ’n vinnige beslissing, terwyl Jackson se suster, La Toya, gesê het sy hoop die jurie “sal die regte ding doen”.
Maar ná etlike ure van beraadslaging het die jurie nog nie besluit oor die enkele aanklag teen Murray in die verhoor wat ses weke gelede begin het nie.
Die adjunk-aanklaer, David Walgren, het betoog die dokter het die ster se dood weens nalatigheid en geldgierigheid veroorsaak. Die dokter het sy optrede probeer toesmeer deur te versuim om paramedici in te lig oor watter dwelms hy toegedien het, het Walgren gesê.
– Volg Nuus24 op Twitter
- Sapa - AFP