Els wil hê Weideman moet R100 000 betaal
2011-09-20 07:05
Kaapstad. – Die sanger Jurie Els wil hê ’n boete van R100 000 en ’n opgeskorte vonnis moet aan Esmaré Weideman, voormalige redakteur van Huisgenoot, You, en Drum, opgelê word nadat bevind is dat sy die hof geminag het.
Daarby moet Media24 ’n boete van R500 000 betaal en saam met Weideman ’n apologie in Huisgenoot en You publiseer waarin hulle die hof om verskoning vra vir die minagting.
So het adv. Danie Dörfling SC, Els se regsverteenwoordiger, Maandag in die Wes-Kaapse hooggeregshof aangevoer in die saak waarin dié hof ’n gepaste vonnis aan Weideman moet oplê.
Weideman is verlede jaar in die appèlhof in Bloemfontein aan minagting van die hof skuldig bevind weens die publikasie in Februarie 2008 van ’n artikel oor Els.
In dié artikel het die sanger Robbie Klay volledig vertel van sy beweerde seksuele molestering deur Els. Els het op 13 Februarie 2008 ’n tydelike interdik teen die publikasie van die artikel gekry.
Die tydskrifte het toe wel ’n gesensureerde weergawe van die artikel gepubliseer.
Weideman het in haar beëdigde verklaring, wat Maandag by die hof ingedien is, gesê sy het deurentyd in oorleg met ervare regslui opgetree wie se oordeel en advies sy hoog aangeslaan en waarop sy gesteun het.
“Ek was werklik onder die indruk dat die tydskrifte nie die hof geminag het nie na aanleiding van die deurlopende gesprekke wat ek met ons regspan gehad het.
“Ek aanvaar die appèlhof se beslissing dat ek wel die hof geminag het, neem volle verantwoordelikheid daarvoor en bied my opregte en onvoorwaardelike verskoning vir die oortreding aan die appèlhof en hierdie hof.”
Adv. Schalk Burger SC, vir Weideman en Media24, het voorgestel dat Weideman ’n boete van R10 000 betaal en Media24 R50 000. Weideman sal ook al Els se regskoste vir dié aangeleentheid dek.
Dörfling het aangevoer dat die twee respondente nie net oor die vingers getik moet word nie.
“Weideman se optrede moet gesien word teen die feitelike agtergrond van die saak en die roekelose manier waarop die twee respondente die gevolge van ’n interdik-bevel probeer vermy het deur ’n strategie wat net as oneerlik beskryf kan word.”
– Volg Nuus24 op Twitter
- Die Burger