Jolie se pa weet nie wanneer sy trou
2013-01-17 12:30
Los Angeles – Die aktrise Angelina Jolie se pa het gesê hy het geen idee wanneer sy en haar verloofde, Brad Pitt, afhaak nie.
Jon Voight , wat in 2010 versoen geraak het met die aktrise nadat hulle byna 'n dekade lank van mekaar vervreem was, het gesê hy is nie betrokke by die paartjie se trouplanne nie en spandeer net tyd met hul ses kinders.
"Eintlik weet ek nie. Ek is nie so met hulle nie. Jy weet, ek het die stories gehoor van wat aangaan. Ek is gelukkig wanneer ek hulle sien, ons speel met die kinders en dit is al," het hy aan EOnline.com gesê.
Gerugte het die ronde gedoen dat die paartjie op Kersdag sou trou, maar hulle het nog nie kommentaar gelewer op die berigte nie.
Pitt het voorheen gesê hy is nie haastig om te trou nie en is bereid om te wag tot wanneer die tyd vir hulle albei reg is.
Die paartjie, wat reeds meer as sewe jaar lank saam is, het in April verlede jaar hul verlowing aangekondig.
Dit sal Jolie se derde huwelik wees, nadat sy voorheen met die Britse akteur Jonny Lee Miller en die musikant Billy Bob Thornton getroud was.
Pitt is voorheen getroud met die aktrise Jennifer Aniston, maar hulle is in 2005 uitmekaar.
– Lees meer hier
– Volg Nuus24 op Twitter
