Jolie gekap oor sy dogter oorbelle laat inskiet
2011-10-03 10:04
Los Angeles – Die aktrise Angelina Jolie is deur ander vroue gekritiseer nadat sy oorbelle laat inskiet het vir haar sesjarige dogter Zahara.
Zahara, wat van Ethiopië aangeneem is, het glo tydens die prosedure in trane uitgebars.
Jolie het haar dogters na ‘n plek, naby die familie se huis in die suidweste van Londen, geneem om vir hulle oorbelle te laat inskiet.
Die vyfjarige Shiloh, Jolie se ander dogter, sou glo ook oorbelle gekry het, maar het daarteen besluit toe sy sien hoe haar ouer suster huil.
Omdat Zahara onder 16-jarige ouderdom is moes Jolie ‘n vorm teken om toestemming te gee.
Nadat dit bekend geword het dat Jolie haar dogters geneem het om oorbelle te kry is sy onmiddellik op sosiale netwerke aangeval.
Een van die vroue het gesê dis mishandeling om ‘n naald in ‘n jong kind se ore te druk om die ouer tevrede te stel as die kind nie daarvoor gevra het nie.
Dié voorval kom slegs ‘n paar dae nadat ‘n verslag bekendgemaak het dat honderde jong kinders behandeling by hospitale moes kry nadat hul ouers hul aangemoedig het om oorbelle te dra.
Dr. Diana Macgregor van die Royal Aberdeen Children’s Hospitaal het gesê sy het in een jaar al 52 kinders behandel wat pyn ervaar weens die dra van oorbelle.
Sy het ouers aangemoedig om te wag totdat hul kinders 15 jaar oud is voordat hulle oorbelle kry.
– Volg Nuus24 op Twitter.
- AP