Jan Blohm-vertoning eindig op suur noot
2011-12-12 13:30
Kaapstad – 'n Jan Blohm-konsert wat Sondag by Dorpstraat-teater in Stellenbosch gehou is, het vir 'n aanhanger van Muizenberg op 'n "onsmaaklike" noot geëindig.
Anton Pretorius en sy meisie was "baie opgewonde" om Sondag na Blohm se vertoning te gaan kyk toe die eienaar van die teater die optrede ná die vierde liedjie beëindig.
Sowat 30 mense het die vertoning bygewoon en kaartjies is teen R70 elk verkoop.
"Hy (Blohm) speel min in die Kaap, so ons het uitgesien na die vertoning," het Pretorius aan Nuus24 gesê.
"Toe hy op die verhoog kom kon jy sien dat hy bietjie geswaai was. Dit was duidelik dat hy nog gekuier was van die vorige aand."
Volgens Pretorius het Blohm se eerste liedjie wat hy gesing het swak geklink en het hy die kitaardrukke op sommige plekke verkeerd gekry.
"Die tweede en derde liedjie was beter en hy het lekker begin opwarm en begin regkom."
Michelle Nolte, eienaar van Dorpstraat, het volgens Pretorius tydens die vierde liedjie Blohm se vertoning onderbreek en gesê dat sy die vertoning gaan beëindig.
Volgens Pretorius het Nolte gesê: “Dames en here, ek gaan ongelukkig die vertoning beëindig, en (kan) nie toelaat dat Jan homself en my besigheid verder verneder nie. Ons sal nie die R70 vertoning geld vra nie, en julle is welkom om nog te bly en die middag te geniet, maar ek gaan nie toelaat dat Jan verder optree nie”.
"Jan was op die stage en dit was baie awkward. Hy het nie lekker geweet wat aangaan nie. Jan was uiters geskok en dit was duidelik op sy gesig. Ek glo Nolte kon die situasie beter hanteer."
Pretorius het gesê twee "ouerige" mense het uitgestap, maar niemand anders het gekla nie.
"Sy (Nolte) het net gedink aan die mense wat uitstap en nie die mense wat hom waardeer nie," het Pretorius gesê.
"Dit was 'n groot verleentheid vir Jan Blohm en vir die skare wat graag vir Jan wou sien optree.
Nolte het aan Nuus24 bevestig dat sy die vertoning beëindig het, maar wou nie verder kommentaar lewer nie.
"Ons het respek vir die kunstenaar en ons wil nie die situasie verder vat as wat dit gister (Sondag) gegaan het nie."
Zinta Kymdell, Blohm se vrou, wou ook nie verder kommentaar lewer nie.
"Ons is cool met die venue en het dinge uitsorteer. Ons wil nie verdere stories hê nie," het sy gesê.
– Volg Nuus24 op Twitter
- Nuus24