Jackson se sjef getuig Murray was 'paniekbevange'
2011-09-30 16:10
Los Angeles – Michael Jackson se gewese persoonlike sjef, Kia Chase, het getuig dr. Conrad Murray het voor die sanger se dood paniekbevange voorgekom, berig The Telegraph.
Chase, die sewende getuie in die saak, was die dag van Jackson se dood by sy herehuis in Kalifornië.
Sy het getuig dr. Murray het paniekbevange die trappe afgehardloop en haar beveel om die sekuriteit sowel as Jackson se oudste seun Prince te ontbied.
Volgens Chase was dít tien minute voor enigiemand die 911-nooddienste geskakel het.
"Ek was in die kombuis besig om middagete voor te berei vir Jackson en sy kinders. Tussen 12:05 en 12:10 het Murray by die trappe af gehardloop en om hulp geroep.
"Hy het baie senuweeagtig voorgekom en het geskree om hulp te kry. Ek het alles gelos waarmee ek besig was en gehardloop om Prince te kry," het Chase aan 'n volgepakte hof in Los Angeles vertel.
Chase se getuienis van die gebeure op die chaotiese dag stem ooreen met dié van Jackson se sekuriteitswag, persoonlike assistent en persoonlike lyfwag wat almal beweer hulle het Murray se gedrag as senuweeagtig en haastig beskou voordat Jackson doodgevind is.
Murray, Jackson se persoonlike dokter, het skuld op 'n aanklag van onvrywillige manslag ontken.
Die staat beweer Murray het Jackson die sterk verdowingsmiddel Propofol gegee wat tot die sanger se dood in Junie 2009 gelei het.
– Kliek hier om na Chase se getuienis te luister.
– Volg Nuus24 op Twitter.