Jackson se dokter 'kon nie alles onthou'
2011-10-04 10:49
Los Angeles – Dr. Conrad Murray kon die dag van Michael Jackson se dood nie die regte tye verskaf oor wat hy gedoen het oomblikke voor die sanger se dood nie, het die hof gehoor.
Dr. Thao Nguyen, ‘n kardioloog, het in die hof getuig Murray kon op 25 Junie tydens hul gesprek by die UCLA Ronald Reagan Mediese sentrum, nie onthou wat hy voor Jackson se dood gedoen het nie.
Nguyen, wat na Jackson omgesien het toe hy na die hospitaal gebring is, het gesê Murray het haar ingelig dat hy twee dosisse lorazepam, op verskillende tye, aan Jackson gegee het om hom te help slaap.
Murray het toe aan haar vertel dat hy Jackson se kamer verlaat het. Hy het met sy terugkoms gevind Jackson haal nie meer asem nie.
Murray het egter aan die kardioloog gesê hy weet nie wanneer hy die lorazepam aan Jackson gegee het, wanneer sy asemhaling gestop het, en wanneer die nooddienste gebel is nie.
Volgens haar het Murray gesê hy kon nie die presiese tye aan haar deurgee nie omdat hy nie ‘n horlosie by hom gehad het nie.
Jackson het weens ‘n sterk dosis propofol gesterf, maar Murray ontken dat hy die een was wat die dwelmmiddel aan hom gegee het.
Volgens dr. Nguyen het Murray nie aan haar genoem dat hy propofol aan Jackson gegee het nie.
Murray het skuld ontken op ‘n aanklag van onvrywillige manslag.
Die verhoor duur voort.
– Bang Showbiz.
– Volg Nuus24 op Twitter.