Jackson se dokter het gesê 'hy makeer niks'
2011-09-20 21:03
Los Angeles – Dr. Conrad Murray het glo aan nooddienswerkers gesê Michael Jackson makeer niks nie toe hulle by die sanger se huis opgedaag het.
Een van die nooddienswerkers, Richard Senneff, was die eerste persoon op die toneel toe nooddienswerkers in Junie 2009 na die Koning van Pop se huis uitgeroep is.
Senneff het in sy verklaring gesê Murray het voor sy pasiënt se lewelose liggaam gestaan en beweer daar is nie ‘n probleem nie.
Volgens Senneff se verklaring was Murray se presiese woorde "hy het nie ‘n probleem nie, hy makeer niks. Hy het heel aand geoefen en ek het hom net behandel vir sy ontwatering".
Murray het onskuldig gepleit op ‘n aanklag van onopsetlike manslag in verband met die popster se dood.
Senneff beweer ook Murray het nie die volle waarheid gepraat oor die medikasie wat Jackson geneem het nie.
“Toe daar gevra is of Jackson enige medikasie geneem het, het Murray nee geantwoord. Daar is later vasgestel dat hy Jackson kalmeermiddels gegee het om hom te help slaap.”
Senneff sê hy het Murray later gesien bottels uit die kamer wegdra. Hy beweer Murray het ook probeer om Jackson op die bed by te bring, alhoewel operateurs van 911 aan hom instruksies gegee het om die sanger se lewelose liggaam na die grond te skuif voordat hy dit doen.
Murray se verhoor begin volgende week en indien hy skuldig bevind word, kan hy tot vier jaar tronkstraf gevonnis word.
– Contact Music.
– Volg Nuus24 op Twitter.