Jackson se dokter getuig dalk self
2011-10-11 08:44
Los Angeles – Dr. Conrad Murray se prokureurs is tans besig om te besluit of hy self moet getuig.
Murray, Michael Jackson se persoonlike dokter, het skuld ontken op ‘n aanklag van onvrywillige manslag.
Die staat beweer Murray het Jackson die sterk verdowingsmiddel propofol gegee, wat tot die sanger se dood in Junie 2009 gelei het.
Alhoewel hofverrigtinge Maandag uitgestel is weens die openbare vakansiedag, Columbus-dag, was Murray se prokureurs hard aan die werk om te besluit of dit ‘n goeie idee sal wees as hy in die getuiebank verskyn.
Volgens ‘n bron sal die staat gereed wees indien Murray self in sy verhoor getuig.
“Die staat het ‘n sterk saak teen Murray opgebou en hulle sal die geleentheid verwelkom om hom onder kruisverhoor te neem.”
Volgens E! Online sal dié besluit afhang van hoe die verhoor verloop wanneer dit Dinsdag hervat word.
“Indien die regspan bevind dit sal hul kliënt se saak help as hy self getuig, sal Murray getuig. Indien dit nie die saak steker maak nie, sal hulle dit nie doen nie. Daar is nog geen besluit geneem nie,” het ‘n ander bron gesê.
– Contact Music.
– Volg Nuus24 op Twitter.