Jackson se dogter wil popster wees
2010-02-15 18:33
Los Angeles – Michael Jackson se kinders lewe nou “meer normale” lewens vandat hulle onder die toesig van hul ouma Katherine Jackson is en sy dogter Paris beplan om in haar pa se musikale voetspore te volg.
Die familie van die superster, wat verlede Junie oorlede is, kan nie glo hoe baie sy drie kinders Prince Michael (12), Paris (11) en die sewejarige Prince Michael II of ‘Blanket’ na hom aard nie.
Dit lyk asof die oudste twee veral in sy voetspore sal volg.
“As jy met Prince praat is dit asof jy met Michael praat. Hy is so slim en volwasse vir sy ouderdom. En Paris wil ‘n sangeres wees,” het ‘n bron onthul.
Vandat die kinders met Jackson se ma in Kalifornië woon, lei hul glo meer normale lewens as toe hulle met hul pa gebly het.
“Dit gaan goed met hulle. Dis te danke aan die liefde en ondersteuning wat hulle kry. Hulle gee mekaar baie genot terwyl hulle lag, speel en deur die huis hardloop,” het Adam Streisand, die familie se advokaat gesê.
“Katherine luister na die kinders. Sy wil hulle vryheid gee en hulle ondersteun.”
- Contactmusic