Jackson se Thriller-baadjie opgeveil
2011-06-07 09:43
Beverly Hills – Die baadjie wat Michael Jackson in sy Thriller-video aangehad het gaan opgeveil word.
Volgens Darren Julies is die rooi en swart leerbaadjie die mees herkenbare en betekenisvolle item wat opgeveil kan word. Julies verwag dat die baadjie vir ongeveer $200 000 (sowat R1,3 miljoen) verkoop gaan word.
Die veiling sal op 25 Junie by Julien’s Auctions in Beverly Hills plaasvind.
Jackson se handtekening is ook op die baadjie nadat hy dit as ‘n geskenk aan sy kostuumontwerpers Dennis Tompkins en Michael Bush gegee het.
Hy wou hê hulle moes die klein kalfsleer-baadjie gebruik as voorbeeld vir sy toekomstige kostuumontwerpe.
‘n Gedeelte van die geld wat ingesamel gaan word sal aan die Shambala Preserve geskenk word waar Jackson se twee Bengaalse tiere, Thriller en Sabu, woon sedert hy sy Neverland-plaas in 2006 verlaat het.
Ander items wat opgeveil gaan word sluit in die pryk wat hy gedra het toe hy sy This Is It-konsertreeks in Londen aangekondig het, die vilthoed en handskoen wat met blinkertjies versier was en sy hemp wat hy in sy Scream-video aangehad het.
Die publiek kan vanaf 13 tot 25 Junie by die Julien’s Auctions Gallery na die items gaan kyk wat opgeveil gaan word.
- Volg Nuus24 op Twitter.
- AP