Jackson-saak: Kombinasie van middels was ‘resep vir ramp’
2011-10-14 11:18
Los Angeles – Die kombinasie van middels wat op die dag van Michael Jackson se dood aan hom gegee is, was ‘n "resep vir ‘n ramp," het ‘n kenner Donderdag aan die hof gesê.
Dr. Conrad Murray (58), wat Jackson se persoonlike dokter was ten tyde van sy dood, staan tereg op ‘n aanklag van onvrywillige manslag. Murray het skuld ontken.
Murray se besluit om propofol aan die sanger te gee nadat hy reeds twee ander kalmeermiddels aan hom gegee het, was ‘n "perfekte storm," wat tot die sanger se dood in Junie 2009 gelei het, het dr. Nader Kamangar, ‘n spesialis gesê.
Lykskouers het propofol tesame met die kalmeermiddels lorazepam en midazolam in Jackson se bloed gevind.
“Hierdie skemerkelkie was ‘n resep vir ‘n ramp,” het Kamangar aan die hof in Los Angeles gesê.
Die derde week van die verhoor het Donderdag tot ‘n einde gekom. Die verhoor sal na verwagting vyf weke duur.
Murray se regspan beweer Jackson was ‘n desperate verslaafde wat die propofol dalk self geneem het terwyl sy dokter nie in die kamer was nie.
Die verdediging het Woensdag dié bewering laat vaar, maar hulle voer steeds aan die moontlikheid bestaan wel dat Jackson die propofol deur ‘n buisie in sy been kon inspuit.
– Volg Nuus24 op Twitter.
- AFP