‘Jackson kon nie self propofol neem nie'
2011-10-12 09:08
Los Angeles – Michael Jackson kon nie sy eie dood veroorsaak het deur self die sterk verdowingsmiddel propofol te neem nie, het die medikus, wat die nadoodse ondersoek op die sanger gedoen het, Dinsdag aan die hof gesê.
‘n Foto van Jackson se lyk is ook in die hof gewys.
Christopher Rogers, wat die nadoodse ondersoek op die Koning van Pop se lyk gedoen het na sy dood in Junie 2009, sê dit is meer waarskynlik dat dr. Conrad Murray, Jackson se persoonlike dokter, per abuis vir hom te veel propofol gegee het om hom te help slaap.
Murray staan tereg op ‘n aanklag van onvrywillige manslag en word daarvan verdink dat hy ‘n oordosis van dié sterk verdowingsmiddel aan Jackson gegee het. Murray se prokureurs beweer egter Jackson was verslaaf aan verdowingsmiddels en het self die dodelike dosis propofol geneem wat tot sy dood gelei het terwyl Murray nie in sy kamer was nie. Murray het skuld ontken.
Murray het tydens ‘n onderhoud aan die polisie gesê hy was slegs vir twee minute weg van Jackson om na die badkamer te gaan. Met sy terugkoms het hy agtergekom Jackson haal nie asem nie.
Volgens Rogers kon Jackson, wat reeds onder verdowingsmiddels was, in dié kort rukkie nie self nog propofol by die buisie in sy been ingespuit het nie.
“Hy sou nie so vinnig kon ophou asem haal voordat Murray teruggekom het nie.”
Rogers het aan die hof gesê hy dink Murray het ‘n verkeerde dosis propofol aan die sanger gegee terwyl hy probeer het om hom te help slaap.
Murray het erken hy het 25 milligram van die verdowingsmiddel aan Jackson gegee om hom te help slaap, en moes gereelde dosisse aan hom gee om hom bewusteloos te hou.
Rogers het ook opgemerk dat Murray nie die regte toerusting gehad het om die dosisse wat hy aan Jackson gegee het na te gaan nie.
In die onderhoud wat Murray twee dae na die sanger se dood met die polisie gehad het, het hy vertel hoe Jackson amper blind was en hoe hy nooit regte kos geëet het nie. Jackson het glo ook probleme gehad om te urineer en het homself somtyds natgemaak.
Murray se verhoor sal na verwagting tot einde Oktober duur. Indien hy skuldig bevind word kan hy tot vier jaar tronkstraf gevonnis word.
– Volg Nuus24 op Twitter.
- AFP