Jackson-dokter se verhoor sal kykers vasgenael hou
2011-09-26 12:28
Los Angeles – Aanhangers van Michael Jackson sal Dinsdag voor die kassie vasgenael wees om die verhoor van dr. Conrad Murray, Michael Jackson se persoonlike dokter, te volg.
Murray, wat skuld ontken het op ‘n aanklag van onvrywillige manslag weens die Koning van Pop se dood in Junie 2009, se verhoor gaan uiteindelik begin.
Sewe mans en vyf vroue tussen die ouderdom van 32 tot 57 is Vrydag as jurielede gekies en sal Murray se lot beslis.
Die 58-jarige Murray kan tot vier jaar tronkstraf gevonnis word indien hy skuldig bevind word.
Daar word verwag dat sy verhoor vyf weke sal duur.
Murray word daarvan verdink dat hy die sterk verdowingsmiddel Propofol aan Jackson gegee het.
‘n Lykskouer het Jackson se dood toegeskryf aan moord, veroorsaak deur ‘n oordosis van die verdowingsmiddel propofol, gekombineer met ander medikasie.
Murray se prokureur, Ed Chernoff, sal na verwagting aanvoer die bekende Thriller-sanger was verslaaf aan verdowingsmiddels en hy het telkemale meer van die medikasie geneem wanneer Murray nie in die kamer was nie.
Die verhoor sal regstreeks op televisie uitgesaai word, maar regter Michael Pastor het belowe die jurielede sal nie afgeneem of op televisie gewys word nie.
Jackson se familie se na verwagting in die hof wees insluitend sy ma, Katherine, en pa Joe Jackson. Van sy broers en susters sal ook die verhoor bywoon.
– Volg Nuus24 op Twitter.
- AFP