Jackson-dokter se verhoor begin September
2011-08-11 10:04
Los Angeles – Die verhoor van Michael Jackson se dokter, Conrad Murray, sal op 26 September in Los Angeles begin, het ‘n regter Woensdag gesê.
Murray het onskuldig gepleit op ‘n aanklag van onopsetlike manslag in verband met die popster se dood.
Staatsaanklaers in Los Angeles beweer Murray is vir Jackson se dood verantwoordelik.
Hy kan tot vier jaar tronkstraf opgelê word as hy skuldig bevind word.
Jackson het Murray in 2009 as sy persoonlike dokter aangestel terwyl hy voorberei het vir optredes in Londen se O2-arena.
Murray, wat op die oggend van Jackson se dood op 25 Junie saam met hom by sy huis was, het erken hy het die verdowingsmiddel Propofol aan die 50-jarige sanger gegee om hom te help slaap.
– Independent Online.
– Volg Nuus24 op Twitter.