Jackson-dokter pleit onskuldig
2010-02-09 02:52
Los Angeles - Michael Jackson se dokter, Conrad Murray, het onskuldig gepleit op 'n aanklagte vir onvrywillige manslag in verband met die popster se dood.
Staatsaanklaers in Los Angeles beweer Murray het Jackson doodgemaak.
Die dokter is Dinsdag vrygelaat nadat hy $75 000 (R582 000) borgtog betaal het. Hy het homself vroeër die dag aan die owerhede oorgegee.
Hy kan tot vier jaar tronkstraf opgelê word as hy skuldig bevind word.
Jackson het Murray in 2009 gehuur om sy persoonlike dokter te wees terwyl hy voorberei het vir optredes in Londen se O2-arena.
Beamptes sê die sanger is dood ná Murray die verdowingsmiddel propofol en ander kalmeermiddels vir hom ingegee het vir sy chroniese slapeloosheid.
Jackson is op 25 Junie dood.
Murray se prokureur het aangedui die dokter beplan om terug te keer na sy mediese praktyk in Houston, Texas terwyl hy op sy verhoor wag.
Die staatsaanklaers wil egter hê Murray se lisensie om te praktiseer moet opgeskort word terwyl hy op borgtog uit is.
– Sapa-AP