Jackson: 'Ek was nooit ‘n kind nie'
2011-10-06 21:00
Los Angeles – Michael Jackson het in ‘n onduidelike gesprek op ‘n
hartverskeurende bandopname gesê hy is in pyn omdat hy nie sy kinderjare geniet
het nie, het AFP berig.
Die opname – ‘n gesprek met sy dokter weke voor die sanger se dood in 2009 – is Woensdag in hof gespeel.
In die semi-onsamehangende gesprek met dr. Conrad Murray,
wat op ‘n aanklag van strafbare manslag tereg staan, praat die popsanger oor ‘n kinderhospitaal
wat hy graag met die opbrengs van sy optredes wil stig.
“Elvis het nie dit gedoen nie, ook nie die Beatles nie. Ons
moet fenomenaal wees,” het Jackson in die opname gesê.
Hy het bygevoeg dat wanneer aanhangers die optrede verlaat,
moet hulle sê: “Ek het nog nooit so iets in my lewe gesien nie. Hy is waarlik
die grootste vermaaklikheidskunstenaar wat die die wêreld ooit gesien het.”
Aan die einde van die aangrypende gesprek heers daar 'n stilte van 13 sekondes voordat Murray vir Jackson vra of hy nog reg is.
Nog agt sekondes verloop voordat Jackson antwoord: “Ek is aan die slaap.”
Murray word van onopsetlike strafbare manslag op Jackson aangekla, nadat hy die sanger na bewering 'n oordose pille ingegee het om hom te help slaap.
Volg Nuus24 op Twitter
- AFP