Idols-wenners vertel lewensverhale by Baxter
2011-08-05 13:48
Kaapstad - Die twee Idols-wenners Karin Kortjé en Jody Williams is binnekort by die Baxter-teater te sien in die produksie, This Is My Life.
Kortjé het gesê sy wou nog altyd deel wees van 'n teaterstuk. En het toe met die bekende kunstenaar Alistair Izobel, wat die vervaardiger is, oor haar idees gaan gesels.
"Dit sou aanvanklik 'n eenvroustuk wees, maar nadat ek en Alistair gesels het, het ons besluit om vir Jody te betrek. My en Jody se lewenservarings is baie dieselfde en ons was altwee onervare toe ons Idols gewen het," het Kortjé vertel.
En dis juis wat dié produksie só interessant en anders maak.
Nie net gaan Kortjé en Williams die gehoor met hul pragstemme en sang vermaak nie, maar hulle gaan ook hul lewensverhale vertel, hoe dit tydens die Idols-oudisies was en wat hulle alles ervaar en beleef het.
Elkeen van hulle het met 'n lys van liedjies na vore gekom wat hulle gevoel het pas by hul lewensverhale.
Volgens Williams gaan die gehoor die geleentheid kry om die 'ware Karin en Jody te leer ken'.
"Ons gaan die mense op 'n reis neem en hulle gaan dinge oor ons leer en sien wat hulle nie van ons geweet het nie."
Volgens Kortjé werk sy en Williams juis lekker saam omdat altwee van hulle iets anders na vore bring.
Altwee is dit eens dat hulle nooit in hul wildste drome gedink het dat hulle Idols sou wen nie.
"Daar was soveel ander deelnemers wat net so goed was. Die publiek se stemme kon maklik in enige rigting gegaan het," het Kortjé vertel.
Die direkteur van die produksie is Basil Appollis met Camillo Lombard wat die musikale direkteur is.
Die produksie, This Is My Life, is vanaf Maandag 8 tot Saterdag 13 Augustus by die Baxter-teater te sien.
Kaartjies kos R120 en is by Computicket beskikbaar.
– Kliek hier om 'n video van Karin te sien waar sy besig is om te repiteer vir die vertoning.
– Volg Nuus24 op Twitter.