Idols-wenner se eks brand dood
2010-04-21 15:34
Kaapstad - Karin Kortje, die wenner van die derde seisoen van Idols SA, se eks-kêrel is dood nadat 'n vuur by 'n hut uitgebreek het.
Stanley Witbooi (28), wat glo dié Idols-wenner se eerste liefde was, is vroeg Maandagoggend oorlede toe 'n hut in Grabouw afgebrand het.
Witbooi was ook die pa van Kortje se oudste seun.
Abel Tshantshana (58) sê sy kon hoor hoe hy uit die hut skree en om hulp roep terwyl hy probeer het om te ontsnap.
Hy het glo 'n ketting gebruik om die deur van binne af toe te sluit voor hy gaan slaap het. Toe hy probeer ontsnap, kon hy egter nie uitkom nie.
Volgens Daily Voice het die hut aan Witbooi se tannie, Joyce Velani (45), behoort. Hy't glo gereeld in die hut gebly terwyl sy gewerk het.
Volgens Zubin Naidoo, Kortje se besigheidsbestuurder, is Kortje en die familie deur die tragedie geskok.
- Daily Voice